’S e am buthaide an t-eun as bitheanta ann a’ Hiort, le timcheall air 270,000 eun ann as t-samhradh. Cha bhi iad a’ tighinn air tìr ach airson na h-uighean a bhreith agus coimhead an dèidh an àil.
Cha bhi buthaidean a’ neadachadh air oirean nam bearraidhean. ’S ann a bhios iad a’ dèanamh toll anns na leòidean gorma feòir aig mullach bearraidh agus a’ breith an sin. Tha An Dùn uabhasach freagarrach dhaibh oir tha iad air an dìon an sin bho chreachadairean. Nuair a thèid na h-iseanan a bhreith as t-samhradh agus a thòisicheas iad a’ dol air an iteig, bidh solais nan togalaichean a’ tàladh cuid dhiubh. Mar sin, bidh an neach-raoin ann a’ Hiort a’ tomhas nan eòin, a’ cur fàinne aithneachaidh orra agus gan leigeil às a-rithist far ceann a’ chidhe.
Chan eil gob soilleir, buidhe, srianagach air a’ bhuthaide ach as t-samhradh. ’S ann dorcha buidhe a tha e an còrr dhen bhliadhna. Bidh iad a’ cleachdadh an sgiathan airson a bhith ag itealaich fon uisge. Tha buthaidean a’ cur seachad a’ mhòr-chuid dhem beatha aig muir agus tha iad sònraichte math air snàmh. Canaidh cuid ann an eileanan na h-Alba 'Tammie Norries' ri na buthaidean.