|
Coinnich
an luchd-obrach |
||
| Neach-raoin Hiort – Bill Shaw | ||
|
Sin sibh! Bill Shaw an seo, agus ’s e urram a th’ ann a bhith an seo. ’S e a’ phrìomh obair agam daoine a chuideachadh gus toileachadh fhaighinn às an àite seo. Tha sin a’ ciallachadh fàilte a chur air luchd-tadhail nuair a thig iad agus cuideachadh a thoirt do dhaoine a tha airson tuilleadh ionnsachadh mu na h-eileanan seo san latha an-diugh agus san àm a dh’fhalbh. Tha mi cuideachd a’ sgrùdadh na tha gam breith de dh’fhulmairean is de dh’fhaireagain agus a’ cumail sùil air àireamh caoraich Shòdhaigh is Bhoraraigh (a tha mi a’ tuigsinn a tha pailt cho brèagha ri caoraich Herdwick ann an Cumbria. Chì mi!!). Tha mi cuideachd an dòchas pròiseact a chur air bhonn airson faighinn a-mach mu sgaoileadh na luchd-fheòir ann a’ Hiort, agus bidh mi a’ cumail sùil gun fhios nach tig radain dhan eilean. Tha mi air a bhith an sàs ann an obair glèidhteachais o chionn iomadh bliadhna. Bha an obair iomallach mu dheireadh agam ann an ceann a tuath Mhongolia, far an robh mi ag obair air pròiseact gus bacadh a chur air teine coille. Tha mi dìreach air gluasad an seo bhom dhachaigh ann am Barrow-in-Furness ann an Sasainn far an robh mi ag obair nam neach-faire ann an tèarmann cladaich Walney a Tuath - far am faighear an t-amphibian as teirce agus as motha fuaim am Breatainn, muile-mhàg an natterjack. |
|
|
| Airc-eòlaiche Hiort – George Geddes | ||
|
Seo a’ chiad bhliadhna agam mar arc-eòlaiche ann a’ Hiort, far am bi mi a’ dèanamh iomadh seòrsa obrach eadar rannsachadh, glèidhteachas, sgrùdadh, treòrachadh luchd-tadhail agus a’ cumail sùil air bleith cladaich. Seach gu bheil comharrachadh dùbailte aig na h-eileanan a thaobh Inbhe Dualchais na Cruinne, tha na togalaich, na siostaman achaidhean agus na làraich arc-eòlais gu lèir cudromach agus gun shamhail a thaobh na cruinne. An dèidh 3 bliadhna san roinn phrìobhaidich, tha mi toilichte a bhith ag obair ann an àite cho inntinneach agus cho samhlachail. Ann an Dùn Èideann, rinn mi a’ phrìomh sgrùdadh air Linn an Iarainn ann an Alba. An dèidh sin, rinn mi ceum ann an Oilthigh York ann an Arc-eòlas Thogalaichean a’ coimhead air seasmhachd fad-ùine agus atharrachadh ann an ailtireachd ionadail Innse Gall. Tha mi an dòchas cumail orm a’ rannsachadh air na h-eileanan a bharrachd air a bhith a’ leantainn orm leis an obair ionmholta a rinn an fheadhainn a chaidh romham. |
|
|
|
|
||
| Neach-raoin Mara is Eòin-mhara Hiort – Sarah Money | ||
|
Ann an 2005 chaidh dreuchd samhraidh ùr a stèidheachadh le Urras Nàiseanta na h-Alba gus sùil a chumail air na h-eòin-mhara is air a’ mhuir. Chaidh iongantas àrainn na mara ann a’ Hiort aithneachadh o chionn ghoirid le bhith ga comharrachadh mar Làrach Dhualchas na Cruinne. Bha seo cuideachd mar thoradh air barrachd ùidh ann an eag-eòlas mara is eòin-mhara san fharsaingeachd, gu h-àraidh air sgàth crìonadh mòr o chionn ghoirid ann an eòin-mhara ann an Alba. Bha coltas gun robh an t-àm ann airson an obair seo air an eilean a leudachadh. Tha an obair agam a’ gabhail a-steach a bhith a’ cumail sùil sa cheann fhada air àireamh nan eun-mara air an eilean, a bharrachd air a bhith a’ sgrùdadh bith-eòlas gintinn nan gobhlan-mara. Tha mi cuideachd ag obair còmhla ri bàtaichean daoibhidh a bhios a’ tadhal gus fiosrachadh a chruinneachadh mu gach gnè a chithear sa mhuir nuair a bhios iad a’ daoibheadh. Cuidichidh seo sinn gu bhith a’ gleidheadh na h-àrainn phrìseil seo. Tha mi air a bhith an sàs ann an glèidhteachas nan eun o chionn 13 bliadhna. Thug seo mi gu iomadh àite iomallach, àlainn mar Eileanan Chatham agus Midway Atoll. Seo an còigeamh turas agam ann a’ Hiort ann an iomadh dreuchd. Bha mi fiù ’s a’ campachadh roimhe ann am Boraraigh is ann an Sòdhaigh a’ dèanamh sgrùdadh air gobhlain-mara is buthaidean. Mar phrìomh àite airson eòin-mhara ann am Breatainn, canaidh mi gu bheil Hiort, le sheallaidhean àlainn, air àite cho iongantach anns am b’ urrainn dhomh a bhith ag obair! |
|
|
|
||
Leugh 
