Tha thu an seo: Hiort An-diugh > A’ sgrùdadh na h-Àrainn Nàdarra > Beatha na Mara Beatha na Mara
Tha uisge soilleir timcheall Hiort agus tha iomadh seòrsa ainmhidh is lus ann, an dà chuid eadar loidhne àrd is ìseal an làin agus fon loidhne as isle. Daoibhear a’ togail dhealbhannan de bheatha na mara Dealbh: Rohan Holt Tha na h-àitichean eadar loidhne àrd is ìseal an làin cha mhòr dìreach sa mhòrchuid dhe na h-eileanan. Tha ainmhidhean is lusan orra a tha air iad fhein a dhèanamh suas ri stoirmean a’ Chuain Shiar a bhios a’ gabhail dha na h-eileanan. Tha crios leathann gu h-àrd de bhàirnich gheala agus, gu h-ìseal, tha bann de dh’fheusgain dhubha le feamainn dhearg Mastocarpus stellatus a’ fàs air fheadh. Tha an uair sin creagan ann le feamainn bhàn-dhearg agus stiallan fada de dh’fheamainn ruadh. Ann an corra àite, far a bheil fasgadh o na tuinn, tha seòrsaichean de dh’fheamainn bhalgainn, Fucus spiralis agus Fucus distichus, a tha gu math tearc sa chòrr dhen rìoghachd.
Dìreach fo uachdar na mara tha ceilp a’ fàs gu pailt agus tha iomadh ainmhidh is lus na measg. Tha iomadh seòrsa spuing is cìoch na muice mara a’ còmhdach nan creagan am measg na ceilpe. A’ dol sìos nas doimhne, far nach eil uiread de sholas, tha a’ cheilp nas taine. Ach gu h-iongantach, tha cuid de lusan ceilpe beò ann an doimhneachd a tha còrr is 45m an taca ri 25m air taobh an iar tìr-mòr na h-Alba agus dìreach 10-12m air an taobh an ear. Coille ceilpe le cnagan-feannaig (Echinus esculentus) Dealbh: Sue Scott
Chan eil mòran rùm ann agus tha gach ciadameatair de chreig làn dhen h-uile seòrsa dath is cruth. Tha flùr na gaoithe ann dhen h-uile seòrsa dath eadar uaine, pinc is dearg, meuran nam marbh (corail bog) orains, spuingean orains, buidhe, glas agus uaine, hydra agus còinnich pailt sna h-uisgeachan seo a tha cho beartach le planctan. Tha maorach, seilcheagan, gnamhain, crùbagan agus iomadh seòrsa crosgaig ann cuideachd.
Caileàideascop de chruthan is de dhathan a’ còmhdach nan creagan Dealbh: Sue Scott
Gnamhan (Polycera sp.) Dealbh: Rohan Holt	Crosgag (Asterias rubens) agus flùr na gaoithe (Sagartia elegans) Dealbh: Sue Scott
Tha iasg pailt san uisge shoilleir. Tha sgaothan sgadan a’ deàrrsadh san uisge nuair a dheàlras a’ ghrian air na lannan airgeadach. Tha ròin, cearbain agus mucan-mara minke mu na cladaichean. Tha beatha na mara iongantach dha-rìreabh timcheall Hiort agus tha e air leth prìseil ann an dualchas nàdair Alba. Tuilleadh Fiosrachaidh Dualchan Nàdair na h-Alba 2/5 Anderson Place Dùn Eideann EH6 5NP Fòn: 0044 (0) 131 554 9797 Facs: 0044 (0) 131 554 7900 http://www.snh.org.uk